ઓટલાની ઓળખાણ

 

 

 

 

 

ગામ નો ઓટલો ગામ ની વચ્ચે જ આવેલો છે. ઓટલો એટલે ગામ ની ભાગોળ, ગામ નું બસ સ્ટેન્ડ, ગામ ની માર્કેટ,  નવરા અને નિવૃત થઇ ગયેલા ડોહાઓ ની બેઠક. દેવડા આમ તો નાનુ ગામડુ જ છે, જે વિજાપુર તાલુકા માં આવેલુ છે, ગામ માં અત્યાર ના સમય મુજબ બધી સગવડતા છે જેવી કે લાઇટ, પાણી, ગટર, પ્રાથમિક શાળા, હાઇસ્કુલ, પાકા રસ્તા અને સરકાર ની ભાષા માં કહીયે તો ગોકૂળીયુ ગામ છે. બસ આજ છે દેવડા નો પરિચય.

ગામના ચાર પાંચ જણા નવરા પડે અને ઓટલે આવે પછી જે ચર્ચા થાય એવીજ ચર્ચા અહિયા થાય છે જે માં કોઈ જોડણી કે લખાણ ના ઠેકાણા હોતા નથી. અને શક્ય હોય ત્યાં સુધી ગુજરાતી શબ્દો જ વાપરવા માં આવે છે.

મારો પરિચય -

આ દુનિયામાં પહેલો શ્વાસ અમદાવાદ માં લીધો. લોકો ને ઓળખ આપવા માટે મારા સગાઓએ નામ શૈલેષ રાખ્યુ છે,  મારા વડવાઓ કડવા પાટીદાર સમાજ ના હતા એટલે ” પટેલ ” અટક વારસામાં મળી છે. મારા દાદા ના દાદા ના દાદા………..ના દાદા લગભગ ૧૦ / ૧૨ પેઢી થી મહેસાણા જીલ્લા ના વિજાપૂર તાલૂકા ના દેવડા ગામ માં વસ્યા હતા એટલે દેવડા મારું મૂળ વતન છે. મારા પિતાશ્રી ના માધ્યમિક શિક્ષક ના  વ્યવસાય ને હિસાબે હુ બોલતા, ચાલતા, વાંચતા, લખતા, ભણતા રાજકોટ જીલ્લાના જસદણ તાલૂકાના ગોમા નદી ના કાંઠે આવેલા  વિંછીયા ગામે શિખ્યો, એટલે કાઠીયાવાડ ના તમામ લક્ષણો મારા લોહી માં ભળી ગયા છે. મને આખુ કાઠીયાવાડ નજીકથી જોવાનો અને માણવાનો મોકો મારા વ્યવ્સાય ને લીધે મળ્યો  છે. વિંછીયા આપણા પક્ષી અભ્યારણ હિંગોળગઢથી માત્ર ૧૦ કિમી દૂર એટલે કુદરતને ભરપૂર માણી છે. એટલે જ મારા ચોકઠા ના બીજા પાના પર પક્ષીઓ નો પરિચય મુક્યો છે. વિંછીયા આપણા મોટાગજાના લેખક ” જય ભિખ્ખુ ” ની જન્મ ભૂમિ છે, અને જૈનો માં જે કાનજી સ્વામિ થઈ ગયા તેમને બ્રહ્મ જ્ઞાન આજ ગામ ના પાદર માં લાગ્યું હતું એવી લોક વાયકા છે.  મારા વ્યવસાય માટે મે ૧૦ વર્ષ આજી નદી ના કાંઠે આવેલા શહેર રાજકોટ માં ગાળ્યા છે તેથી રંગીલૂ રાજકોટ પણ મને પોતાનું લાગે છે. આટલો સમય વતનથી દૂર રહ્યા એટલે વતનની નજીક રહેવાના અભરખા જાગ્યા માટે છેલ્લા પાંચ વર્ષથી વતન ની નજીક ના સાબરમતી ને કાઠે આવેલા શહેર અમદાવાદ માં જીવી રહ્યા છીયે.